Олунньу ый 4 күнүгэр, Россия Геройа, биир дойдулаахпыт Михаил Михайлович Стрекаловскай төрөөбүтэ 111 сылын көрсө «Аата үйэлэргэ ааттаныа» кылаас чааһын Хомустаах сүрүн оскуолатын 6-9 кылааһын үөрэнээччилэригэр директоры иитэр үлэҕэ сүбэһитин Петрова Сааскылаана Семеновналыын ыыттыбыт.
Кылаас чааһын олохтоох библиотека фондуттан Герой туһунан тугу ааҕыахха сөбүн билиһиннэрииттэн саҕалаабыппыт. Ол кэннэ М.М. Стрекаловскай олоҕун, сэриигэ хайа военкоматынан ыҥырыллыбытын, ханнык хорсун быһыыны оҥорбутун, сэрии кэннэ тугу үлэлээбитин, наҕараадаларын, Россия Геройун аата хаһан иҥэриллибитин, М.М. Стрекаловскай аатын сүгэр оскуола, уулусса, бэлиэ (знак), алмаас ханна баалларын үөрэнээччилэр оҥорбут иһитиннэриилэриттэн болҕойон билистилэр.
Салҕыы 8 кылаас үөрэнээччитэ Валентин Новгородов «Хааллыҥ дьонуҥ сүрэҕэр» диэн М.М. Стрекаловскайга анаммыт хоһоону дорҕоонноохтук аахпытын бары сэҥээрэ иһиттибит. Хоһоон автора – Николай Литвинцев.
Түмүккэ үөрэнээччилэр истибиттэрин чиҥэтэн ыйытыкка эппиэттээннэр, Герой туһунан билиилэрин хаҥатан тарҕастылар.
