Бүгүн, муус устар 27 күнүгэр, Хомустаахха –Саха АССР 100 сылын көрсө, олохтоох салалта уонна бөһүөлэк культуратын үлэһиттэрин көҕүлээһиннэринэн «Бары - бииргэ» тэрээһин ыытылынна.

    Торжественнай чааһы олохтоох библиотека сэбиэдиссэйэ Егорова М.Н. салайан ыытта. Бэлиэ күҥҥэ бэйэлэрин эҕэрдэлэрин тириэртилэр, санааларын үллэһиннилэр, бөһүөлэк баһылыга – Попов Василий Иннокентьевич уонна өр сылларга салайар үлэҕэ үлэлээбит, нэһилиэк бочуоттаах олохтооҕо – Попов Петр Петрович.

Торжественнай чааһы сынньалаҥ киин иһинэн тэриллибит дьахталлар «Далбарай» вокальнай бөлөхтөрө (салайааччы Анна Бечеканова) ырыанан киэргэттилэр. Салҕыы олохтоох оскуола үөрэнээччилэрин икки ардыларыгар сахалыы авангард муодатын күөн-күрэһэ ыытылынна. Дьүүллүр сүбэ састаабыгар киирэн күөн-күрэһи сыаналаатылар Прядезникова А.Н., Новгородова Е.Н., Дегтярева М.С. Кыайыылахтар бириис тутан үөрдүлэр-көттүлэр. Ол кэннэ кыралыын-улаханныын оһуохай түһүлгэтигэр киирэн, оһуохай таһаарааччылары батыһан дуоһуйа оһуохайдаатыбыт. Тэрээһин кыттыылаахтара биирдиилээн бастыыр иһин ыытыллыбыт «Өбүгэ оонньуулара» күрэхтэһиини сэҥээрэ көрдүлэр. Көрүҥ аайы бастаабыттар сынньалаҥ киин коллектива туруорбут бириистэрин туттулар. «Бары-бииргэ» тэрээһин бөһүөлэк үс түөлбэтин олохтоохторо үллэстэн, астаан аҕалбыт астарынан тардыллыбыт фуршет остуолунан түмүктэннэ. Бүгүҥҥү тэрээһиҥҥэ кыттыыны ылбыт бөһүөлэкпит олохтоохторугар, бука барыгытыгар тэрийээччилэр ааттарыттан махталбытын тиэрдэбит. Аны да бөһүөлэкпит, нэһилиэкпит, улууспут сайдарын туһугар бары бииргэ буолуоҕуҥ!