Кулун тутар 30 — 31 күннэригэр С.С Васильев — Борогонскай аатынан киин бибилэтиэкэ ааҕар салаатыгар Уус — Алдан оройуонна тэриллибитэ 100 — сылын көрсө «Үүнэр — сайдар мин дойдум» улуус нэһилиэктэрин икки ардыларынан ыытыллыбыт культура бэстибээлин чэрчитинэн «Мин нэһилиэгим олоҕо — улууһум историятыгар» диэн икки күннээх научнай — практическай кэмпириэнсийэ ыытылынна. Манна Хомустаах бөһүөлэгин 1930 — 1954 сыллардаах кэрчик кэмнэри хабан дакылаат сурулунна. Дакылаат 8 бастан турар, бастакы холкуостар тэриллиилэрэ, олохтоох сэбиэттэр, пионерия, комсомол, ааҕар балаҕаннар, Аҕа дойду Улуу сэриитэ, фроҥҥа үлэлэр, билиилээх дьоннор, улахан тутуулар тустарынан матырыйаал хомуйан оҥордубут. Үлэ сурулларыгар И.В Гоголев — Бурҕас «Лөгөйдөр», «Тыа Сабарайдара», «Лөгөй былыргыта» кинигэлэрэ, Хомустаах аҕа саастаахтара, олохтоохторо Попов Петр Петрович, Гоголев Петр Николаевич, Бурнашев Василий Васильевич, Попова Римма Петровна биэрбит ахтыыларыгар, кинигэлэригэр, хаартыскаларыгар олоҕурдубут. Бу 1930 — 1954 сыллаах кэрчик кэм туһунан дакылаат оскуола оҕолоругар, бөһүөлэк олохтоохторугар былыргы Хомустаах историятын билэллэригэр улахан туһалаах буолуоҕа диэн эрэнэбит.
