Россия библиотекаларын күнүн чэрчитинэн Хомустаахтааҕы олохтоох библиотека өрөспүүбүлүкэтээҕи «Кинигэ күүһэ» диэн акцияны тэрийэн ыытта. Биһиги бөһүөлэкпитигэр маннык тэрээһин 2019 сылтан буолар. Олохтоох библиотека сэбиэдиссэйэ Егорова Мария Николаевна эрдэттэн бэлэмнэнэн сылтан сыл аайы араас сонун темалары хабан үрдүк таһаарыылаахтык ыытар. Сүрүн сыала – ааҕыы суолтатын үрдэтии, үүнэр көлүөнэҕэ кинигэ туһатын, наадатын өйдөтүү буолар.
Быйылгы тэрээһин Кыайыы 80 сылыгар ананна. Ол иһин биир дойдулаахпыт РФ уонна СӨ суруналыыстарын сойууһун чилиэнин, 1997 сыллаахха «Илин Эҥэр» экономическэй сайдыы зоната олохтообут В.В. Никифоров – Күлүмнүүр аатынан, СӨ суруналыыстарын Сойууһун «Кыһыл көмүс бөрүө» бириэмийэлэр лауреатын, «Уус-Алдан улууһун социальнай – экономическай сайдыытыгар уонна улуус култууратын сайдыытыгар киллэрбит кылаатын иһин» бэлиэлэр хаһаайынын, СӨ Бочуоттаах бэтэрээнин, Уус-Алдан улууһун Лөгөй уонна Чурапчы улууһун Бахсы нэһилиэктэрин бочуоттаах олохтооҕун, 25 кинигэ ааптарын Уйбаан Уйбаанабыс Попов – Бахсылыырап хоһооннорун, айымньыларын Мария Николаевна сырдатта. Кини 1993 сылтан саҕалаан үйэтитиигэ үлэтин саҕалаабыт эбит. Бастакы кинигэтэ Чурапчы көһөрүллүүтүгэр аналлаах. «Ыар кэмнэр тыыннаах туоһулара» диэн кинигэ буолар. Ити
кинигэ Кыайыы 55 сылын көрсө күн сирин көрбүт. Ол курдук, сэрии, үлэ-тыыл ветраннарын, сэрии кэмин оҕолорун туһунан ыстатыйалары, очеркалары сурукка тиһэн хаалларбыта.
«Кинигэ күүһэ» диэн бүгүҥҥү акцияҕа Уйбаан Уйбаанабыс «Аҕаларбыат, эһиги тыыннааххыт» диэн 2005 сыллаахха суруйбут хоһоонун олоҕун аргыһа, Уус-Алдан норуотун иискэ маастара, Лөгөй нэһилиэгэр уус-уран айымньы сайдыытыгар кылаатын иһин бэлиэ хаһаайката, үлэ ветерана Зинаида Николаевна Попова кэлбит ыалдьыттарга ааҕан иһитиннэрдэ. Дириҥ ис хоһоонноох айымньыны истэн кыралыын-улаханныын долгуйдубут. Оскуола оҕолорун хос эһэлэрэ, эбэлэрэ ахтыллыбытын Мария Николаевна кэпсээтэ. Маны таһынан бэйиэт, очеркист, арассыыйа Суруналыыстарын уонна Саха Өрөспүүбүлүкэтин суруйааччыларын сойуустарын чилиэнин, Саха Өрөспүүбүлүкэтин культуратын туйгуна, Уус-Алдан улууһун Лөгөй нэһилиэгин бочуоттаах олохтооҕун Ульяна Бурнашева – Уйана хоһоонун иккис кылаас үөрэнээччитэ Валерий Новгородов аахта.
П.Н. Гоголев аатынан сынньалаҥ киин сэбиэдиссэйэ Бечеканова Анна Семеновна тэрээһини хаартыскаҕа түһэрэн үйэтиттэ. Быыстапка Борисова Татьяна Касьяновна толкуйунан киэргэйдэ, биһирэбили ылла.
Акцияҕа сылдьыбыт дьон астынныбыт, сэргээн иһиттибит, элбэҕи биллибит. Бүгүҥҥү тэрээһин сыалын ситтэ.
Яна Новгородова, Хомустаах бөһ.
