Ааҕааччыларбытыгар быыстапкабытын билиһиннэрбиппит. Ол кэннэ «Ойуунускай уонна Уус Алдан» иһитиннэрии оҥорбуппут.

Биллиилээх судаарыстыбаннай диэйэтэл, саха сэбиэскэй литературатын төрүттээбит поэт, прозаик, драматург, публицист, учуонай П.А. Ойуунускай төрөөбүтэ 130 сылын иитинэн Хомустаах бөһүөлэгин П.Н. Гоголев аатынан сынньалаҥ киинин коллектива уонна олохтоох библиотека бөһүөлэк ыччаттарын хамаандаларын икки ардыларыгар суруйааччы айымньыларыттан дорҕоонноохтук ааҕыыга «Мин ырыам ылланыа… Мин аатым ааттаныа…» күөн күрэс тосхолун ыыттыбыт.

Түөртүү киһилээх үс хамаанда кытынна. Дьүүллүүр сүбэ уонна көрөөччүлэр хамаандалар П.А. Ойуунускай хоһоонноруттан, кэпсээннэриттэн, «Улуу Кудаҥса» сэһэниттэн, «Ыраахтааҕы ыйааҕа» пьесатыттан быһа тардыылары аахпыттарын астына иһиттибит, көрдүбүт. Уопсай түмүккэ Эльвира Федорова хапытааннаах «Ытарҕалар» хамаанда бастаан, П.А. Ойуунускай мөссүөннээх кубок тутан олуһун үөрдүлэр. Кыттааччыларбыт бары тэрээһинтэн астыннылар. Кэлэр сыл бастакы кварталыгар өссө көрсүөх буолан тарҕастыбыт.