Улууспутугар бастакы народнай библиотека тэриллибитэ 100 сылыгар аналлаах «100 сыл кэрэни, сырдыгы саҕан» тематическай биэчэр Лөгөй нэһилиэгэр алтынньы ый 10 күнүгэр буолан ааста.

    Бу күн улуустааҕы кииннэммит библиотечнай тиһик директора Копырин Иван Данилович уонна киин библиотекаттан коллегаларбыт кэлэн олус истиҥ көрсүһүүнү тэрийэн ааҕааччылар астынан тарҕастылар.

    Ааҕааччылары кытта көрсүһүү Хомустаахтан саҕаламмыта. Тэрээһин салҕыыта Кэптэни бөһүөлэгэр ыытыллыбыта. С.С. Васильев-Борогонскай аатынан киин библиотека библиотекардара Лөгөй лицей-интернатын үөрэнээччилэригэр библиотечнай уруок ыыппыттара. Күнүс 14:00 чаастан Бүөтүр Оҕотоойоп аатынан сынньалаҥ киин фойетыгар «100 сыл кэрэни, сырдыгы саҕан» тематическай биэчэр торжественнай чааһыгар мустан методическай киин бэлэмнээбит сценарийынан барбыт тэрээһини сэҥээрэ көрдүбүт, кытынныбыт.