Бэс ыйын 5 күнүгэр, Аар саарга аатырбыт олоҥхоһут Дмитрий Михайлович Говоров - Олоҥхоһут Миитэрэй төрөөбүтэ 175 сылынан, Хоро нэһилиэгин олохтооҕо, олоҥхону толорооччу Бурцев Афанасий Петрович – Бөскөй Бөҕө «Оҕустаах Охонооһой Олоҥхолоох айана» бырайыага Хомустаах бөһүөлэгиттэн саҕаланна.

    Олоҥхоһуту Хомустаах бөһүөлэгин культуратын үлэһиттэрэ киирии ааркаҕа көрүстүлэр. Ол кэннэ Хомустаах сүрүн оскуолатыгар олоҥхоһут Афанасий Петрович Бурцевы кытта көрсүһүү ыытылынна. Оскуола үөрэнээччилэрэ «Оҕустаах Охонооһой Олоҥхолоох айана» бырайыак туһунан иһитиннэрии кэннэ Афанасий Бурцев толоруутугар «Эрчимэн Бэргэн» олоҥхоттон быһа тардыыны сэҥээрэн иһиттилэр.

    Бүгүҥҥү тэрээһиҥҥэ мустубуттар олоҥхо истэн, оҕус миинэн, хаартыскаҕа түһэн астынан тарҕастылар. Олоҥхоһут Бурцев В.П. – Бөскөй Бөҕө, оҕуһунаан «Уолчаанныын» Хомустаах ыалыгар Людмила Васильевна, Семен Николаевич Кудриннарга хонуктуу тохтоотулар.

   Сарсын Афанасий Бурцев Бороҕон нэһилиэгэр сылдьар. Бу бырайыагынан Афанасий Бурцев – Бөскөй Бөҕө улууспут 8 (аҕыс) бөһүөлэгин хабар былааннаах.